ភ្នំពេញ៖ លោកគ្រូ ហុងដា (Keisuke Honda) បានបង្ហោះសារបង្ហាញអារម្មណ៍ ក្រោយបញ្ចប់ភារកិច្ចដឹកនាំក្រុមបាល់ទាត់ជម្រើសជាតិកម្ពុជារយៈពេល៥ឆ្នាំ និង ផ្តាំផ្ញើរថា «ត្រូវមានក្តីស្រមៃ ហើយដើរតាមក្តីស្រមៃ»។

នៅព្រឹកថ្ងៃទី១១ ខែឧសភា ឆ្នាំ២០២៣ គ្រូបង្វឹកក្រុមបាល់ទាត់គោព្រៃកម្ពុជាលោក ហុងដា បានបង្ហោះសារលើបណ្តាញសង្គមលោកផ្ទាល់ថា ការងារដឹកនាំរបស់លោកនៅកម្ពុជាត្រូវបានបញ្ចប់ហើយកាលពីយប់មិញដែលជា ការដឹកនាំប្រកួតចុងក្រោយរបស់លោក ដោយរំពឹងនឹងបានលទ្ធផលល្អប្រសើរ ប៉ុន្តែមិនអាចសម្រេចបាន។ លោកបាន «ជីវិតមិនគួរមានការសន្យានោះទេ ដែលការពិតខ្លះពិបាកសម្រាប់លោកទទួលយក»។

លោកបានឱ្យដឹងទៀតថា លោកមានអារម្មណ៍ដដែលចាប់តាំងពីការចាប់ផ្តើមការងាររបស់លោកតាំងពីឆ្នាំ២០១៨ ប៉ុន្តែកីឡាករ និងអ្នកគាំទ្រជាកម្លាំងចិត្ត និងក្តីសង្ឃឹម ដែលជាមូលហេតុលោកអាចបន្តដល់រហូតដល់ទីបញ្ចប់នៃការដឹកនាំនេះ។

លោក ហុងដា ថា៖ «អរគុណ អ្នកទាំងអស់គ្នាសម្រាប់អ្វីគ្រប់យ៉ាងក្នុងរយៈពេល ៥ឆ្នាំមកនេះ។ អ្នកបានផ្តល់ឱ្យខ្ញុំ និងកីឡាករទាំងអស់នូវអ្វីៗជាច្រើន។ ខ្ញុំមានមោទនភាពចំពោះអ្នកទាំងអស់គ្នា។ ជាចុងក្រោយខ្ញុំចង់ប្រាប់អ្នកពីពាក្យនេះ «មានក្តីស្រមៃ ធ្វើតាមក្តីស្រមៃ»។

គួរឱ្យដឹងដែរថា លោក ហុងដា (Keisuke Honda) បានចប់ភារកិច្ចក្នុងការដឹកនាំ ក្រុមបាល់ទាត់ ជម្រើសជាតិកម្ពុជា កាលពីការប្រកួតនៅយប់ថ្ងៃទី១០ ខែឧសភា ឆ្នាំ២០២៣ បន្ទាប់ពីកម្ពុជាចាញ់ ឥណ្ឌូណេស៊ី ក្នុងលទ្ធផល១-២ ដែលធ្វើកម្ពុជាជាម្ចាស់ផ្ទះ ខកខានឱកាសឡើងប្រកួតវគ្គពាក់កណ្តាលផ្តាច់ព្រ័ត្រ៕